– ەلباسى «قازاقستان 2050 جىلعا قاراي ءوزىنىڭ وندىرىستىك اكتيۆتەرىن ەڭ جاڭا تەحنولوگيالىق ستاندارتتارعا سايكەس تولىقتاي جاڭارتۋى ءتيىس» دەگەن ۇلكەن جاۋاپتى مىندەت جۇكتەگەن بولاتىن. سوندىقتان, بۇگىندە ەكونوميكامىزدى يندۋستريالاندىرۋ ماسەلەسىنە باسا نازار اۋدارىلۋدا. بۇگىنگى كۇن تالاس اۋدانىنىڭ الەۋمەتتىك-ەكونوميكالىق ومىرىندەگى ايتۋلى كۇن. ويتكەنى, اۋداندا جاڭا ينۆەستيتسيالىق جوبا ىسكە قوسىلىپ وتىر, – دەدى اكىم.
جوبا 2015-2019 جىلدارعا ارنالعان قازاقستان رەسپۋبليكاسىنىڭ يندۋستريالدى-يننوۆاتسيالىق دامۋ مەملەكەتتىك باعدارلاماسى اياسىندا جۇزەگە اسىرىلدى. اتالمىش جوبانىڭ قۇنى 1946,0 ميلليون تەڭگەنى قۇرايدى. جوبانىڭ جىلدىق قۋاتتىلىعى 110 مىڭ توننا. قازىرگى تاڭدا زاۋىتتا 68 جاڭا جۇمىس ورىندارى اشىلىپ وتىر. بۇگىندە زاۋىتقا يتالياندىق قۇرال-جابدىقتار ورناتىلىپ, كارەر تولىقتاي گەولوگيالىق زەرتتەۋدەن وتكىزىلگەن. زاۋىت اعىمداعى جىلدىڭ قاڭتار-ماۋسىم ايلارىنا 14357,0 توننا ءمارمار ۇنتاعىن جانە 511,0 توننا ءمارمار ۇگىندىسىن ءوندىرىپ, جالپى ءونىم كولەمى 105,5 ميلليون تەڭگەنى قۇراعان.
ايتا كەتەيىك, 2015-2019 جىلدارعا ارنالعان يندۋستريالدى-يننوۆاتسيالىق مەملەكەتتىك باعدارلاماسىنا سايكەس, اعىمداعى جىلى وبلىستا قۇنى 15,4 ميلليارد تەڭگەنى قۇرايتىن 12 ينۆەستيتسيالىق جوبا ىسكە اسىرىلۋدا. وسى جوبالار اياسىندا كەلەشەكتە 1400 جاڭا جۇمىس ورىندارىن اشۋ جوسپارلانىپ وتىر.
حاميت ەسامان,
«ەگەمەن قازاقستان»
جامبىل وبلىسى
